“Ek sal jou enkels kinkel” dis ‘n lyn uit Sy klink soos lente, ‘n Afrikaanse rolprent wat ek gisteraand op Showmax gekyk het. Dit was so ‘n pragtige storie. Ek weet nie hoe ek dit nie al vroeer gekyk het nie, want dis al in 2016 gemaak!

Sy klink soos lente is ‘n liefdesstorie. Ben, ‘n werktuigkundige, ontmoet Linda, ‘n suksesvolle exec, by ‘n stil kroeg. Hy herken haar as sy baas se dogter en toe sy vra wat hy doen antwoord hy – “ek’s in ‘n band”. Hulle flankeer ‘n bietjie en hy belowe hy sal leeus stoei vir haar ensovoorts…

Ek herken van die “pick-up lines” en daardie eerste ontmoeting in die kroeg het gemaak dat ek fliek gekyk het.

Afrikaanse rolprente is anders as Hollywood-rolprente. Die karakters is meer onskuldig, liefdesstories is soet, mooi en ruk aan jou hartsnare. Die karakters ontvou soos blomme en die taal rol soos heuning van hul tonge af.

Ek is getroud met ‘n regte egte Ier wat nie juis my taal kan praat nie, maar selfs hy geniet Afrikaanse rolprente. Pad na jou hart was sy eerste nie-Schuster fliek en selfs hy het dit geniet.

Ek dink ek gaan ‘n punt darvan maak om al die Afrikaanse rolprente te kyk – soos toe ek nog ‘n kind was!Ek gaan nie resensensies begin skryf nie maar eerder my liefde vir Afrikaans deel.